رمضان جانا .. عشان 6 جنيه ؟

نشر الكاتب بهاء حجازي، مؤلف روايات" لم تعتنق دينا بعد، علي صفحته الرسمية علي موقع التواصل الاجتماعي "فيسبوك" تفاصيل مثيرة عن أغنية رمضان جانا وتضمنت التالي:

اغنية رمضان جانا دي اغنية عظيمة .. انا اصلا بحبها اسمعها قبل وبعد وفي رمضان.. ومن قبل رمضان بأسبوع بتشتغل بكثافة في الراديو في التلفزيون في الشوارع .. اغنية عظيمة بس هي اتعملت ليه وازاي.. خلينا نحكي قصة الاغنية الرسمية لشهر رمضان.

في واحد اسمه حسين طنطاوي ... كتب الاغنية .. ولحنها محمود الشريف وادوها لسلطان الاذاعة احمد عبد القادر يغنيها.. احمد عبد القادر دا كان مطرب مشهور وهو اللي عمل اغنية وحوي يا وحوي.. اياحا.. وكمان وحوي اياحا.. ما خلاص يا نجم.

احمد عبد القادر خد الاغنية وراح للاذاعة .. فرفضوا وقالوله مينفعش مطرب يغني اغنيتين في نفس الموضوع.. خليها شعبان جانا وتعالى (طبعا بقلش).. هما رفضوا عشان هو عامل اغنية قبل كدا لرمضان... فعبد القادر اعتذر للملحن والمؤلف.. فراحوا لعبد المطلب .. وعبد المطلب مطرب لازم يتم اعادة اكتشافه لانه مهضوم حقه ولو قريت عنه هتحبه..

برضه ليه راحو لعبد المطلب مراحوش ليه لغيره.. قالك اصل محمود الشريف هو عبد المطلب متجوزين اختين.. والاقربون اولى بالمصلحة.

المهم عبد اللمطلب اصلا مكانش مقتنع.. بس هو كان مديون وعايز فلوس والاذاعة هتديله 6 جنيه في الاغنية .. فوافق يغنيها.. عشان الـ 6 جنيه.. وعمنا وجدي الحكيم الاذاعي الشهير قال عن لاغنية: " طلب حصل على 6 جنيه مقابل آداء هذه الأغنية لإنه كان محتاج لهم ومزنوق في المبلغ ده"، وهتلاقي في حوار مع عبد المطلب مع وجدي الحكيم قال عن الاغنية دي: "" أغنيتى أهم من بيان المفتى ولو أخذت جنيهًا واحدًا عن كل مرة تذاع فيها كنت سأصبح مليونيرًا ومن أغنى الأغنياء".

(على جنب بما اننا جبنا سيرة عبد المطلب.. اشهر اغاني طلب هي اغنية ساكن في حي السيدة وحبيبي ساكن في الحسين.. الاغنية دي اصلا اصلا لحنها محمد فوزي عشان يغنيها لنفسه.. وبعد ما لحنها وعمل بروفات.. المقربين منه قالوله بلاش يا فوزي .. الاغنية مش لايقة عليك.. فاداها لعبد المطلب وبقت اشهر اغانيه.. ( بالمناسبة على بالمناسبة "وفقا لخرائط جوجل فإن المسافة بين حي السيدة و الحسين هي٣ كيلو يعني رايح جاي تعملها ساعة ... . وعبد المطلب محسسنا ان هو بيضحي عشان حبيبه .. احنا انضحك علينا ياجماعة..

نرجع لرمضان جانا.. الاغنية كلماتها اتغيرت يعني اللي انت بتسمعه مش كلام الاغنية الاصلي..

فالاغنية الاصلية بتقول وفقا لمقال وسيم عفيفي في موقع تراثيات: "

الليل نولع قناديلك والشمع يقيد

والليل بطوله نغنيلك ونقول ونعيد

وندور على بيوت أصحابنا

نملى جيوبنا من أحبابنا

من العصر نستنى المدفع وودانا معاه

من ساعة ما يلعلع في الجو صداه

والأكل قدامنا محمر ومشمر

رمضان جانا أهلاً رمضان

طيب ما هي حلوة اهي نغيرها ليه .. قالك يا سيدي .. خلاص الكهربا دخلت فمش منطقي اننا نولع شمعة وكلوب وقناديل .. فلازم نغير النقطة دي .. ولما جم غنوا الاغنية في التلفزيون .. في المونتاج شالوا جملة من العصر نستني المدفع.

وزي ما قال صوت عبد المطلب نقلا عن كلمات حسين طنطاوي: "بتغيب علينا وتهجرنا وقلوبنا معاك .. وفي السنة مرة تزورنا وبنستناك .. من امتى واحنا بنحسبلك ونوضبلك ونرتبلك".