خالتك أنووش تكتب..يافتاح ياعليم يارزاق ياكريم..حرب!!

صحيت الصبح ولسه بقول يافتاح ياعليم يا رزاق يا كريم لقيت كل شباب ورجالة مصر بيسألوا عن ترجمه جملة "أنا مكمل حياتي معاها عشان العيال بالأوكراني

قولت أكيد في مسابقة في أوكرانيا عن أكتر رجل مصري مستحمل مراته عشان العيال، شويه صغيرين ولقيت نص ستات مصر بتسأل عن سعر جرام الدهب وصل لكام عشان اللى معاها خاتم حلق تلحق تبيع.. قولت ده مهرجان جديد لبيع الخواتم..أنا أصلي بحاول ألقطها وهي طايرة.

بكلم مع أختي، قالتى روسيا ضربت أوكرانيا قولتها يالهوووي ضربه في قلبه إحنا ناقصنا كمان حرب..فربطت الأحداث ما بين الرجالة اللي بتسأل على العيال وما بين مهرجان بيع الخواتم، ومابين جرب أوكرانيا، وخالتك شاطرة ربطت الأحداث وعرفت تحل الفوازير.

من طلعت نهار الخميس وكلنا شايفين، ارتفاع أسعار الطاقة والقمح والذهب وخسارة البورصة المصرية 19 مليار والبورصة العالمية مليارات!!

بس اللي يهمني بجد جدا هم أخواتنا المصريين ربنا يسترها والموضوع يعدي بسلام، علشان أرواح الناس مهياش لعبة في يد السياسة –حتى لو ما تمناتش تكون كدة-.

اصل الحكاية صراع قديم وطويل بين الشيوعية والليبرالية أو الشرق والغرب، والشرق ده شرق أوربا مش الشرق الأوسط لا سمح الله.

ولو مش متابع اللي بيحصل بين أوكرانيا وروسيا حالا فصدقني أنت فاتك كتير اوي لان اللي بيحصل حاليا مقدمات لحرب عالمية ثالثة لا تقارن أبدًا أبدًا بالحرب العالمية الأولي ولا التانية، في ظل الخوف من النووي والذري والكيماوي والبيولوجي.

خد بالك من زمان جدا وفيه علاقات متوترة بين روسيا وأوكرانيا، أول حاجه كدا أوكرانيا كانت تبع الاتحاد السوفيتي زمان وبالتالي كانت جزء موالي لروسيا، وبعد سقوط الاتحاد السوفيتي في 91، استمرت أوكرانيا تحت نفوذ روسيا بس من خلال منظمة "جي يو إٍس" بس أوكرانيا نفسها تسيب المعسكر الشيوعي وتروح للمعسكر الليبرالي، والتعاون بينها وبين أمريكا ودول الاتحاد الأوربي كان بيكبر كل يوم عن يوم.

التعاون ده قلق روسيا جامد، وغارت على مصالحها ومنافعها..مش حبًا في أوكرانيا لأ ده حب في النفوذ والسيطرة وأكل الثروات الحرام، بس الضربة اللي حصلت في عام 2014 لما الأوكرانيين رفضوا النفوذ الروسي، وانتخبوا أول رئيس ليبرالي في وقت المظاهرات، روسيا طلعت بجزيرة القرم وضمتها، وأوكرانيا والغرب قالك لو على القرم ياخدها ويغور بس بوتين أبدًا، فضل مصمم أن أوكرانيا أرض روسية وأن تعاونها مع أمريكا وأوربا الغربية، في خطر عليه وعلى روسيا.

وفضلت مفاوضات ومناوشات وضغط وحركات بين الغرب وروسيا، اللي عملت دور عربجي أوربا وأعلنت الحرب تحت شعار حماية إقليم دونباس.

الخطير دلوقتي أن لما تفكر في عواقب حرب زي دي هتلاقيها كتير،

مثلا أول مشكلة هي اللاجئين .. الحرب هتكون في أوروبا بس اللاجئين هيبقوا في كل العالم لو الحرب طالت.الأهم أن 14% من استخدام القمح في مصر بنجيبه من من أوكرانيا، خد عندك أننا كمصر لا مع دول ولا مع دول بس لينا مصالح مشتركة مع دول ودول ودول، فياتري موقفنا هيبقى إزاي لو حرب أوكرانيا وقتها طول عن كدة وبقى لازم مواقف واضحة، هنختار الشرقي ولا الغربي.