خالتك أنوش تكتب..30 قاعدة لركوب الميكروباص

هدخل في الموضوع على طول وهنقل ليك 30 قاعدة لركوب الميكروباص وصلت ليهم، ويمكن لو أنت مشيت عليهم، فأكيد هتركب الميكروباص وأنت مطمئن.

1- متركبش ورا السواق عشان هتلبس في لم الاجره.

2- السواق مش هيوطي الكاسيت .. أجِل مكالماتك لحد ما تنزل.

3- متوقفش قبل ملف علشان لو الميكروباص وقفلك الناس اللي وراه مش هتسيبه ولا هتسيبك في حالك عشان قافل عليهم الطريق.

4- الأربعه اللي على الكنبه الواحده لازم يقعدوا زجزاج طالع نازل طالع نازل والعكس ممكن.

5- جهز أُجرتك من قبل ما تركب.

6- سيجاره السواق دي من المقدسات .. ماينفعش تقوله يطفيها.

7- قوله على المكان اللي أنت نازل عنده قبلها بشارعين على الأقل.

8- وافق السواق في أي موضوع هو بيتكلم فيه عشان متدخلش في حوارات مالهاش لازمة .. السواق دايماً على حق.

9- الكرسي اللي جنب السواق ده للمزز بس .. ماتفكرش تركب فيه عشان تبقى ضيف لطيف.

10- ذوق سواق الميكروباص في اختيار الاغاني و الدباديب اللي في العربية دي حاجه مبنية على جرح قديم ومش قادر ينساه و مش موضوع للمناقشة.

11- عينك على جيبك طول الرحلة تجنباً للسرقات.

12- ربطات الحجاب العجيبة بتاعة البنات ممكن تضايقك وأنت قاعد .. حاول تجنُبها بهدوء.

13- لازم يكون معاك كمامة صغيرة .. هتشكرني بعدين على الفكره دي.

14- دايماً هتلاقي واحد بيفاصل في الاجرة مع السواق .. ده وحش سيبك منه.

15- المكتوب على ضهر الميكروباص دي حكمه مش حاجه بتضحك.

16-صور الطفل المحطوطة اللي هتلاقيها ده غالباً ابن السواق او ابن أخته.

17-اللي نازل الأول بيركب بره.

18- أنت متحرش في نظر اي بنت حتى لو شيخ بعمة .. خليك عينك على جيبك زي ما قولنا عشان في بنات ما بتصدق يلاقوا حد بيبصلهم.

19- في الميكروباص أنت مسير مش مخير.

20- كونك أنك تمد ايدك للميكروباص اللي جنبك عشان تجيب منه فكه للسواق ده واجبك وأنت مش بتخاطر بدراعك ولا حاجة.

21- متفكرش تبتسم .. أنت في ميكروباص ومفيش أي حاجه تدعو للابتسام.

22- متتفرجش على موبايلك جوه الميكروباص عشان قهيبقى ملكية عامة؛ على الأقل 4 بيتفرجوا معاك على اللي بتعمله.

23- في بني آدمين كده الميكروباص بيدوس عليهم و هو ماشي .. مالناش دعوة.

24- الكلاكس بتاع السواق ده مش لتنبيه السواقين اللي حواليه .. ده بيت مع الاغنية اللي هو مشغلها وبيشتم بيه الناس في الشارع.

25- الميكروباص مش بتاع حارات .. بتاع غرز.

26- كوبايه الشاي الفاضية جنب السواق دي تقريباً الميكروباص بينزل بيها .. زي برضه الراجل التخين أبو شنب اللي دايماً تلاقيه جنب الازاز وعلى رقبته فتافيت مناديل.

27- لو قاعد جنب الباب هتلبس في فتحه و قفله لباقي الركاب اللي داخلين و خارجين.

28- قواعد المرور بالنسبه للسواق دي مجرد إرشادات و تسقط منها صفة الالزامية.

29- لو لقيت السواق مشغل أغاني أجنبي أعرف أنك مخطوف.

30- وأخيراً .. السواق مش بيقف .. الميكروباص بيفضل ماشي و لما سيادتك تيجي تنزل بيهدي بس .. و وأنت و لياقتك بقي !!